|
 Rof
Codina foi un dos primeiros persoeiros que realizaron un estudio
exhaustivo do gando galego, experimentando sobre todo co vacún,
o mellor xeito de melloralo. A súa capacidade de traballo
e iniciativa enormes, así como a súa facilidade
para penetrar nos medios agrícolas, xornalísticos
e profesionais, fixeron del unha personaxe notoria na Galicia
do primeiro tercio de século.
Juan Rof
Codina naceu na localidade barcelonesa de El Prat de Llobregat
en 1874 nunha familia modesta. Acudiu á escola ata
a idade de catorce anos, para traballar despois no negocio
familiar. Marchou a Madrid onde cursou a carreira de veterinaria,
e rematados os estudios gañou as oposicións
de Sanidade Militar, sendo destinado a Lugo.
En 1906 funda nesta cidade unha clínica coa que consegue
a representación do Instituto Pasteur para Galicia
e Asturias. Preocupouse das perdas que sufrían os labregos
coa nacida, enfermidade que atacaba ás reses recén
paridas. Xunto a este traballo de investigación práctica,
realiza outros máis teóricos que axudan a unha
mellor comprensión dos problemas gandeiros galegos,
moitos deles endémicos.
Entre
1903 e 1907 foi redactor da revista coruñesa Prácticas
Modernas, e colaborou na catalana El Cultivador Moderno.
En 1910 está na Coruña como inspector provincial.
Na mellora das razas galegas, Rof Codina colaborou estreitamente
coa Granxa Instituto, cos sindicatos agrícolas e as
Sociedades Agrarias. Xa na II República, en 1932, Gordón
Odrás, Director Xeral de Gandería, chámao
para que dirixa a Inspección Xeral de Veterinaria.
Co fin da Guerra Civil é expedientado e enviado a Tenerife,
retornando a Lugo en 1941 e xubilándose tres anos despois.
Desde esta data organiza a Cátedra Móbil de
Divulgación Pecuaria de Galicia. Morre en Lugo en 1967.
Ideoloxicamente podemos afirmar que Rof Codina foi un rexeneracionista
típico, membro do grupo que irrompe con forza entre
1898 e 1907, xunto a personalidades como Valeriano Villanueva,
Rodrigo Sanz, Basilio Álvarez ou Lugrís Freire.
Aínda así, os seus movementos políticos
estarán ó redor do socialcatolicismo, o que
non foi un atranco para que entendera a Galicia como unha
"pequena Suíza", ó asegurarlle un
futuro como o de Holanda ou Dinamarca, países estes
tamén cunha forte presencia gandeira na súa
economía.
|
|
|
