A RECUPERACIÓN DA LIBERDADE
1975 - 1983
En 1975 morría o xeneral Francisco Franco, e con el desaparecía a última Dictadura da Europa Occidental. O pobo recuperaba unhas liberdades que lle foran usurpadas nunha contenda civil, que na maioría dos casos era recordada como un feito remoto. Galicia comezaba a espertar paseniñamene, ó igual que o resto do Estado, dun sono profundo. As forzas políticas do momento reclamaban un autogoberno, do que xa se gozara brevemente en 1936, así como do recoñecemento da súa singularidade. Isto era defendido tanto polas opcións que estiveran na oposición, como polas agrupacións políticas de centrodereita.
A situación económica non deixaba moito lugar para os experimentos temerarios, e nas manifestacións que se propagaban polas cidades escoitábanse consignas meramente políticas, así como reivindicacións socioeconómicas, sobre todo en ferrol e Vigo.
A constitución foi aprobada maioritariamente en 1978, e todas as forzas políticas amosaron a súa conformidade con eses resultados. Tan só discreparon aquelas agrupacións situadas á esquerda do P.C.E, que paulatinamente foron aceptando a Carta Magna e ós estatutos autonómicos que dela emanaban. Neste intre danse os primeiros pasos da Xunta Preautonómica, presidida por Antonio Rosón. Era un órgano sen a penas competencias e integrado por figuras políticas de segunda fila. Un ano despois establécese unha comisión preparatoria do estatuto, o documento que sae desa reunión é coñecido como "Estatuto dos 16". Sen embargo, a U.C.D recortou prerrogativas, o que supuxo a oposición de boa parte dos baróns do partido, entre eles Rosón.
En 1981 celébranse as primeiras eleccións autonómicas, nas que A.P acada 26 escanos, por 24 de U.C.D. Gerardo Fernández Albor é elixido primeiro presidente da Xunta de Galicia, sendo Rosón presidente do Parlamento.