Non foi a selección española de fútbol a primeira en triunfar en Corea, xa que o pasado ano 2001 o artista chantadino Juan José López Martínez, máis coñecido como Lomarti, foi o único galego no Spanish Scupltor Symposium 2001. Un simposio que se celebrou na cidade coreana de Kwangiu (da provincia de Kyonggi) e na que Lomarti desenvolveu unha das súas creacións inspirada na cultura coreana. Á escultura resultante chamoulle "O gardián da casa de Oriente", e malia contar cun proxecto de desenvolvemento previo, gozou de numerosas modificacións feitas "in situ". Lomarti quixo reflectir coa súa escultura "a relación do individuo coa natureza e a disciplina coa que se comportaban en todos os seus aspectos".
Posteriormente Lomarti, que alterna na súa expresión como artista a escultura e a pintura, fixo unha mostra de de obras de ámbalas dúas modalidades na Casa de Galicia en Madrid no pasado Nadal. Lomarti, que tamén cultiva outros xéneros como o deseño gráfico e a fotografía, así como calquera tipo de expresión que caiba na experiencia plástica, está nestes momentos a preparar unha mostra moi completa dos seus traballos para expor posiblemente no Museo Provincial de Lugo en vindeiras datas.

Foi en 1983 cando Lomarti comezou a expor ó público as súas creacións nunha mostra colectiva que baixo o nome "Nova Xeración", estivo aloxada no Círculo da Artes de Lugo. Despois diso comezou a súa traxectoria expoñendo en Francia e en outras moitas cidades españolas. En 1989 o seu traballo é exposto en Bos Aires e é seleccionado para o premio Pablo Gargallo en Zaragoza. Xa en 1993 recibe o premio da Bienal de Lalín e as súas pezas preséntanse en Arco, en Madrid, e en Lisboa, no Instituto Cervantes. Dende o ano 96 realiza distintas performances por varios puntos de España e publicou coa editorial TrisTram o libro de poemas ilustrados titulado Coroas de Mercurio
Para as súas obras escultóricas Lomarti alterna as instalacións con talla directa en madeira, mármore ou granito. Da súa escultura dise que é inventiva, intensa, totémica, recoñéceselle tamén unha ollada crítica e chea de ironía e humor, adxectivos estes que tamén se aplican á súa obra pictórica.

Tódalas noites Lomarti achégase ó seu ordenador e comeza a navegar polo océano virtual das webs plásticas de todo o planeta. O artista, que gusta de estar ó día en todo tipo de informacións "artísticas e tamén sociais", asegura que aproveita eses momentos de navegación para facer "lecturas esporádicas de textos variopintos, e ver moita fotografía de autor". Pero tamén no seu traballo é importante o uso de Internet, xa que a través do correo electrónico o chantadino mantén as súas relacións profesionais con galerías de todo o mundo.Lomarti tamén ten colaborado coa web de microrelatos Infimos.net, liderada polo xornalista Santiago Jaureguizar, onde o escultor ten relatos ínfimos como "Rápido", "Historia dunha xunta en Galicia", "Filósofos" e "A pantasma da rúa Diamante", relatos todos eles que se poden ler nesa páxina.