Cando en 1979 Claudio Rodríguez Fer publicaba o seu primeiro libro, "Poemas de amor sen morte" daba comezo ó que sería un pioneiro ciclo de poesía erótica galega que seguiría en outras publicacións do autor lucense como "Tigres de Ternura" (1981) co que obtivo o Premio da Crítica Española. Esta sinal de identidade deste poeta, narrador, ensaísta e catedrático de literatura, foi obxecto de consideración no libro "Por un vocabulario galego do sexo. A terminoloxía erótica de Claudio Rodríguez Fer (1996) da tamén poeta Olga Novo. Con máis de vinte libros publicados de seu poderiamos destacar outros nomes que corren paralelos na súa bio-bliografía , eses son os de Jose Ángel Valente e Anxel Fole, autores dos que é estudioso e especialista na súa obra.

Este estudio, no caso de Fole, reflectiuse na publicación de varias obras sobre os escritos do autor de "Á lus do candil", así como na elaboración do guión dun documental dedicado a Fole, realizado un ano antes da morte deste. A súa relación con Valente foi estreita e longa e contempla a publicación de varias obras sobre o autor ourensán e dedicadas á súa obra, a dirección en Santiago en 1993 do "Encontro Internacional sobre José Ángel Valente". E ademais en 1999 Claudio Rodríguez apadriñou a Valente na súa investidura de doutor "Honoris Causa" na Universidade de Santiago, onde actualmente o lugués é secretario da Cátedra de Poesía e Estética José Ángel valente, ademais de ser profesor titular de Literatura Española Contemporánea na Facultade de Humanidades de Lugo.

Actualmente Claudio está realizando nun taller de gravado a edición dunha carpeta de augafortes orixinais titulada "A vida. Gravados sobre o corpo" e simultanea esta actividade coa edición dun número monográfico da revista "Unión Libre. Cadernos de vida e culturas", tribuna libertaria que formou xunto a Carmen Blanco en 1977 e desde entón ambos coordinan. O monográfico que se titulará "Indíxenas" iníciase cunha longa colaboración de Noam Chomsky. Dentro da continua revisión e atención á obra de Valente, Claudio ven de rematar recentemente a edición do libro "Cuaderno de versiones", de José Ángel valente, publicado por Galaxia Gutemberg / Círculo de Lectores, onde Rodríguez Fer reuniu "tras unha longa investigación" as moi numerosas que de outros autores estranxeiros fixera o ourensán ao castelán ou ao galego, constituíndo, nas súas propias palabras "unha especie de espontánea e vivida antoloxía da poesía universal realizada por Valente e moi esperada desde hai anos".

Rodríguez Fer achégase á rede asiduamente para comunicarse e investigar dun xeito normalizado pero asegura que non padece "ningunha adicción virtual nin ludopatía internáutica". Claudio afirma sentirse tan lonxe dos que desprezan Internet coma dos que o sacralizan, e desde punto intermedio non dubida en asegurar que en Internet "hai tanto de bo ou de malo como en calquera outro lugar e ofrece tantos resultados e baleiros como calquera outro medio"