Fran Alonso é un dos capitáns do barco de Xerais. O encargado do timonel do impulso e da renovación das liñas de Edición Xeral, que son as que compoñen as coleccións literarias, universitarias, infantís e xuvenís, turismo e de obras singulares. Un cargo co que pretendeu facer fronte ós novos aires que se impulsaban no departamento de edición, baixo a supervisión de Xosé Manuel García Crego. E este vigués de 39 anos asumeu o reto que se lle encargou na editorial na que entrara a traballar hai agora dez anos.

Alonso é, coma moitos deste oficio, xornalista e escritor, aínda que non quedan claros os lindes entre o que é oficio e o que é vocación. Filólogo de formación (licenciouse en Filoloxía Galego-Portugesa pola Universidade de Santiago) pronto lle entraría o verme do xornalismo. E foi cando formou parte do equipo que botou adiante “Diario 16 de Galicia”. Pero os seus camiños literario e xornalístico entrecruzáronse e foron un percorrer constante. Por unha banda a súa tarefa xornalística deu libros como “Territorio ocupado” que foi unha crónica sobre o conflicto do pobo saharauí feita desde os campamentos de refuxiados de Tinduf; e na súa faceta como escritor publicou numerosas obras tanto de narrativa (“Trailer”, premio Blanco Amor de novela, “Cemiterio de elefantes”) como poesía (“Persianas, pedramol e outros nervios”, “Tortillas para os obreiros”). Pero é esta tarefa, a de escritor, que non deixa esquecida, e de aí que acabe de rematar un relato para o libro colectivo “Materia prima” e un libro de literatura infantil, “ A casa da duna” pensado para os máis cativos. Pero a cabeza de Fran Alonso non para de maquinar e no outono volverá á carga con varios proxectos entre os que está un libro infantil, recuperar a veta do xornalismo cun par de libros de actualidade e unha guía turística na que traballa co fotógrafo Manuel G. Vicente.

E en todo este complexo mundo de comunicación Fran Alonso tamén ten sitio e cabida a internet. Pero tanto para o seu traballo como para o seu lecer. “Comunicación, busca de información, exploración pola web, utilización de recursos...” son os principais usos que lle dá Alonso a este invento que lle parece “un dos avances máis significativos e definitorios da historia”.