Carlos Taibo quixo preguntarse porqué as cousas son como son e o resultado foi "Cien preguntas sobre el nuevo desorden". Unha publicación que a Punto de Lectura acaba de poñer á venda. Unha obra na que pretende facer unha introducción pedagóxica ós principais problemas do mundo contemporáneo (globalización, ONU, hexemonía estadounidense...). O do mundo de hoxe e os seus problemas é un tema que moito lle gusta a Taibo, que ten entre os seus titulos "Europa sen Folgos", "A nova desorde internacional", "¿Un novo Terceiro Mundo?". E todo desde o punto de vista pedagóxico. Non en van a súa vida profesional está moi ligada á docencia. É profesor de Ciencia Política e director do programa de estudios rusos da Universidade Autónoma de Madrid.

Agora mesmo está acumulando lecturas para facer un libro sobre Europa e, mentres acariña este proxecto, anda a traballar nun libro sobre a crise internacional derivada dos feitos do 11 de setembro. E en galego tamén ten planes, exactamente un texto sobre os movementos de resistencia global.

A internet, amén de ser un deses fenómenos da globalización sobre os que teoriza, sírvese dela como unha ferramenta para saber o que contan os xornais doutros países e as páxinas de perfil policito radical e as especializadas na Europa cerntral e oriental. Aínda así, o que máis emprega é o correo electrónico.