Poeta e traballadora incansable a prol da difusión da cultura no noso país, Ana Romaní naceu en Noia en 1962, aínda que vive en Compostela desde os once anos. De calquera xeito foi a vila mariñeira a que viu os primeiros resultados das súas inquedanzas vitais: a participación no grupo de teatro Tiruleque ou na revista "Carabela de Xeada" e a creación da asociación cultural Catavento son algúns exemplos. A comezos dos oitenta comezou a coñecerse a súa actividade poética con recitais, colaboracións en revistas ou certames coma o Xente Nova na Poesía Galega ou O Facho. Non foi ata 1987 cando saíu á luz o seu primeiro poemario, "Palabra de Mar·, ó que seguiriían "Das últimas mareas" (1994) e "Arden" 1998. No 97 publica o conto "Marmelada de amoras".

Ana foi unha das creadoras da revista feminista "Festa da Palabra Silenciada" e da asociación "Mullleres Galegas na Comunicación". En 1989 comeza a traballar na radio realizando o programa de humor "A viborona" en Radio Nacional de España en Galicia, e no 90 comeza a dirixir na Radio Galega o Diario Cultural. Por este programa desfilaron na última década os principais protagonistas das letras e das artes do país, converténdose nun referente ineludible da información cultural galega. O seu traballo neste espacio valeulle o I Premio Irmandade do Libro (1992), o Premio Xerais á cooperación no eido cultural (1999) e o Premio San Martiño á Normalización Lingüística e Cultural (2000).

Durante anos fixo parte da Sección de Comunicación do Consello da Cultura Galega, participando actualmente na Sección de Música deste organismo. Participou tamén en diversos proxectos artísticos coma os discos "O Son da Pedra" de Milladoiro, "Rosalía na voz dos poetas" ou "Daquelas que cantan", do Patronato Rosalía de Castro.
En 1997 creou con Antón Lopo o Laboratorio de Indagacións Poéticas, no que realizaron os espectáculos "Ó outro extremo do paraíso", "Lob@s" e o Festival de Espectáculos Poéticos "A Boca Aberta" na celebración do Día Mundial da Poesía do PEN Clube Galicia.
No 2000 comeza a participar no proxecto "Son delas", un espectáculos coas principais representantes do folk galego no que Ana recita poetas do país. Este espectáculo aínda se puido ver nos escenarios durante o mes de marzo. Na mesma liña de espectáculos poético-musicais colaborou con Rodrigo Romaní nos recitais "Arden" no 2000 e "Lisboa" no 2001.
Os seus últimos proxectos foron o espectáculo "Catro Poetas Suicidas, Intervención Poética Contra a Levidade" no que recuperaba a obra de catro poetas mortas prematuramente. Recenetmente desenvolveu con Lupe Gómez e Anxos Romeo a posta poética en escea "Estalactitas" e, coincidindo co décimo aniversario da morte de Avilés de Taramancos estaá a realizar diferentes artigos sobre este escritor.
O seu emprego de Internet é fundamentalmente profesional, tanto consultando medios dixitais coma procurando informacións concretas.