Xosé María Fernández Pazos é unha desas persoas que leva nisto da Internet moito antes de que a maior parte de nós soubera sequera de que ía todo isto. Licenciado en Xeografía e Historia e xornalista, Xose María foi o primeiro responsable do servicio de teletexto e de Internet da CRTVG, da súa man comezou ese proxecto de dimensións monumentais que levou de xeito pioneiro en Europa a emisión destes medios, tanto da televisión como da radio autonómicas, por Internet.
No seu labor de xornalista radiofónico Fernández Pazos presenta e dirixe o programa adicado ás tecnoloxías da información "Código", que se emite os sábados na Radio Galega. Pero os oíntes habituais da radio galega tamén recoñecen a Xosé María Fernández Pazos por ser el quen encárgase da elaboración e presentación da información metereolóxica desta cadea.
Ademais de todo iso Xosé María colabora habitualmente co programa "Morriña" realizado pola Asociación de Espacios Radiofónicos Galegos en Cataluña.

O seu interese pola rede levouno a desenvolver o cargo de vocal da sección galega da Internet Society, unha organización non gubernamental que define os estándares de funcionamento de Internet. Actualmente Xosé María levou o seu programa "Código" tamén a outros formatos creando unha páxina web que constitúe un dos maís útis portais de información sobre ás novas tecnoloxías, e a súa última aposta é levar Código tamén ó papel conviritindoa así na única publicación que ten presencia en radio, Internet e papel ó mesmo tempo.

Outro proxecto no que Fernández Pazos está metido ata as cellas neste momento é a dixitalización do amplo arquivo sonoro da Radio Galega recuperando gravacións históricas que corría o serio perigo de desaparecer. Xa dentro doutra das súas múltiples facetas Xosé María tamén está a preparar un libro sobre a historia fotográfica de Ribeira que ampliará o coñecemento desa zona da que el é orixinario.
O seu emprego de Internet dedícase fundamentalmente á busca de información para "Código", o cal de seguro que implica un bo número de horas semanal, ás que hai que sumar as que dedica a buscar información meteorolóxica para as súas prediccións.