13 de decembro de 2003. Luísa Villalta ven desenvolvendo desde hai anos un intenso labor que abrangue unha grande variedade de eidos. A súa experiencia poética, con obras coma "Música reservada", "Ruído" ou "Rota ao interior do ollo" publicadas entre 1991 e 1995, continúa desde entón coa participación en recitais e noutros actos de carácter poético.

Como narradora ten publicado "Silencio, ensaiamos", "Teoría de xogos" e, o ano pasado, "As chaves do tempo". A súa actividade literaria tamén chega ó campo teatral, para o que escribiu as pezas "Concerto para un home só", "O representante", "O paseo das esfinxes" e "As certezas de Ofelia". Licenciada en Filoloxía Galego-Portuguesa e en Hispánica, publicou ensaios coma "O don Hamlet de Cunqueiro: unha ecuación teatral" e "O outro lado da música, a poesía".Por se parece pouco, Luísa é tamén titulada en violín e publica de cando en vez en diferentes xornais e revistas con artigos sobre música. Participa activamente na Asociación de Escritores en Lingua Galega e no Foro da Cultura Galega e é colaboradora habitual de publicacións coma "Grial", "A Trabe de Ouro", "Agália" ou "Tempos Novos" entre moitas outras.

Logo da publicación da novela "As chaves do tempo" o pasado ano, afirma ter varios proxectos en diferente grado de desenvolvemento pero aínda sen pechar. O seu emprego de Internet é fundamentalmente para para o correo electrónico. Segundo ela "desde que teño Internet, o telefone soa menos e o sinal do contestador automático parece adormecido ou estragado". En canto á navegación, afirma que tende a ir a temas e informacións concretas e que non é moi amiga de ir de web en web.