Home de letras dos pés á cabeza, Manuel Forcadela non rexeita apocalípticamente a participación da literatura na era da tecnoloxía e de feito consegue situarse en lugar destacado no noso entorno coa súa páxina web persoal, O Ximnasio de Academo, un lugar para adestrar os gustos literarios cun exercicio intelectual saudable e cheo de posibilidades. Nesa páxina Manuel ten envorcados multitude de textos en galego de tódolos estilos e xéneros posibles. Algúns dese textos son seus, e non é de estrañar xa que ten unha gran cantidade de obra publicada desde o ano 1982 con "Fenda acústica no río", o poemario co que gañou o premio Celso Emilio Ferreiro, ata este mesmo ano co libro de poemas "Lámpada e medusa", co cal ven de ser o máis recente gañador do Premio Esquío de Poesía. No medio moitos libros de poesía, ensaio e narrativa cos que gañou varios galardóns, ademais de numerosos artigos de crítica literaria publicados en revistas especializadas como os Monográficos de A Nosa Terra, A Trabe de Ouro, entre outras.

O vencellamento de Forcadela co mundo das letras non só é unha cuestión persoal, senón tamén profesional pola súa actividade como profesor na Universidade de Vigo, onde é Catedrático de Lingua Galega e Literatura. Alí está agora a traballar, xunto cos seus alumnos da Facultade de Filoloxía nun proxecto sobre a narrativa de Álvaro Cunqueiro, que sen dúbida aportará máis coñecemento da obra do imaxinativo escritor mindoniense.

No que atinxe a Internet Forcadela recoñece que este medio é, para el, "desde hai xa moitos anos, unha ferramenta de traballo insubstituíble". O escritor e profesor asegura obter por este medio moita información, artigos ou ferramentas informáticas que usa, entre outras cousas, para preparar as súas clases. Manuel tamén é un gran afeccionado á musica e ten claro que unha das vantaxes deste medio á que lle quita moito partido é a posibilidade de baixar música desde a rede, "como teño tarifa plana -di Forcadela- o normal é que sempre estea algún ordenador (teño dous, un portátil e outro de sobremesa) conectado a facer algunha cousa, normalmente baixando música".