Esta chairega de Castro de Rei tivo que exiliarse a Porto, durante a dictadura franquista, polo seu activismo clandestino na Unión do Pobo Galego. De volta en Galicia en 1977 fíxose cargo do proxecto do semanario nacionalista A Nosa Terra, que dirixiu durante tres anos. Xornalista doutorada pola Universidade Autónoma de Barcelona, onde exerceu a docencia, creou diferentes proxectos de revistas: Escrita, Festa da palabra silenciada, A trabe de ouro. A ela débeselle en gran parte a apertura da Facultade de Ciencias da Información de Santiago, da que foi decana durante os primeiros anos de arranque do centro. Pero aínda que a súa faceta como xornalista e investigadora da comunicación e a información sexa polo que é máis coñecida, a súa actividade literaria deu tamén numerosas obras de poesía e narración. Como poeta, publicou dous importantes libros nos primeiros anos da década dos setenta: "Parolar cun eu, cun intre, con inseuto" (1970) e "O corvo érguese cedo" (1973), ós que lle seguiu "Linguas mortas. Serial radiofónico" (1989), con fotografías de Ana Turbau.

Ten unha constante actividade investigadora na que saca adiante moitos estudios dos que ten publicados algúns: "Prensa e galeguismo" (1982); "Foto-Xoc e xornalismo en crise" (1988); "O diario post-televisivo" (1992); "Documentalismo fotográfico contemporáneo" (1995). Dentro desta liña de investigación ven de rematar a redacción do "Informe do Audiovisual Galego:1999-2000" e a publicación, en coautoría cos bretóns, Guyot e Michon, do libro "Production télévisée et identité culturelle", PUR, Rennes, 2000. Os seus amplos coñecementos do documentalismo audiovisual fan dela un referente indispensable nesta materia e de acordo con esto arestora dedicase ó estudio do pensamento documental no século XX, ó mesmo tempo que esta encetando a fase de desenvolvemento dun documental sobre o secuestro do "Santa María" no 1961.
Margarita Ledo Andión confesa que non é moi amiga da navegación en Internet ou das buscas ó chou xa que recoñece a súa falta de paciencia nas esperas, e define o seu uso da rede nun sentido puramente funcional de busca de información de axendas, festivais ou bibliografía.