A súa primeira incursión no mundo da literatura (Liques da memoria, 1991) valeulle o premio Bouza-Brey para autores novos. Un inicio máis que positivo para este ceense de 33 anos bo coñecedor da internet e das súas vantaxas. Non en van a súa última e décima obra "memoria de ahab" (2001) publicouse na súa web persoal. Unha experiencia que repetía, xa que fixera o mesmo con"Illa dentro" en 1998; daquela, da man do grupo "Teatro bruto". E nesta dirección, na de seguir traballando na internet que emprega diariamente, están depositados os seus proxectos máis inmediatos.

Este licenciado en filoloxía galego-portuguesa ten no seu haber outros premios e outros recoñecemento que o avalan como unha desas personalidades literarias que están acadando un espacio de seu. Obtivo o premio de narración curta Curuxa do Humor e o Premio Cómaros Verdes do Concello de Vilagarcía de Arousa (con "Casa ou sombra, da colección "Ablativo Absoluto" de Xerais, 1997). E entre as súa produccións destacan "O devalo do mar" (1994), "No mesmo espacio" (1995) ou, nese mesmo ano, "Sotavento dunha singradura".

Membro do Batallón Literario da Costa da Morte, e do Consello editorial da Colección de poesía Letras de Cal, Villar desenvolve a súa tarefa profesional no servicio de normalización lingüística da Confederación Intersindical Galega.