Esta moza nacida en Meirás (Valdoviño) en 1976, escrebe con ganas e sen descanso. Como froito dese traballo obtivo o Premio Modesto R. Figueiredo de narracións curtas en 1998, o Premio Lueiro Rey e o Premio da Casa de Galicia de Barakaldo, e máis recentemente compartíu o Premio de Narrativa Manuel Murguía. Ten publicada unha novela "Eu de maior quero ser (Sotelo Blanco, 1999) e unha narración súa está no recopilatorio "Narradoras. 25 autoras galegas" (Xerais, 2000). Rosa Aneiros tamén forma parte do Consello editorial da colección Abismos da Editorial Xerais. Como xornalista colabora asiduamente con revistas e publicacións, ademais de traballar como bolseira na sección de Comunicación do Consello da Cultura Galega, onde leva adiante unha importante labor de investigación.

Mäis que como autora vese como "a escribana que relata o que os presonaxes queren e, sobre todo, me deixan, cousa en moitos casos incómoda porque nos coñecemos demasiado.
Como traballos recentes reseña "pequenas colaboracións con revistas literarias" e a edición en breve de dúas obras coas que acadou senllos premios o pasado ano: "Mares de Xabre" (relato gañador da décima edición do Certame Manuel Murguía do Concello de Arteixo) e "Corazóns amolecidos en salitre", (obra gañadora do Certame Carballo Calero do Concello de Ferrol de 2001).

Actualmente está a traballar "nunha historia de amor e loita no Portugal de Salazar" que "non me atrevería a chamar relato nin novela aínda porque non sei moi ben que dará de si".
O seu emprego de Internet é "sobre todo, como forma de comunicación e documentación". Sinala que "non me gustan os chats nin os foros pero confésome unha adicta ós correos electrónicos". Internet é "unha fonte impresionante de información tanto de actualidade diaria como outros usos como viaxes, textos históricos... un océano de datos no que só hai que botar a cana para obter verdadeiras xoias. Cómodo, rápido, accesible... e de balde!"