|
CUESTIÓN
DE INTERPRETACIÓN
Hoxe
en día falar en voz alta da tenrura, da sensibilidade, da
esperanza, é case un acto de valentía, unha actitude
subversiva. Con todo, paréceme a min, o mundo non habería
ser mellor sen a ilusión da lotería de nadal, sen
os nenos creren nas fadas, sen a maxia da intelixencia e tampouco
creo que fosemos menos ignorantes de non existiren os horóscopos.
Os
horóscopos están escritos con tales ambigüidades
e tópicos a propósito. A creatividade está
na interpretación e non na predicción, case sempre
feita por un bolseiro ó que tanto lle ten a posición
de Marte respecto de Mercurio. Nos que se publican nos diarios nunca
lerás: "Hoxe vas morrer". Non, porque todos sabemos
que hai cousas que non se poden predicir, simplemente porque son
tan espantosas que non as cremos posibles. Sen embargo, son precisamente
os científicos os que anuncian tales fatalidades baseándose
en cálculos estatísticos, ¿ou é que
non teñen a ousadía de predicirche cando e de que
vas morrer? Quen consulta o horóscopo o que busca é
unha regandixa pola que albisca-lo éxito profesional e persoal.
Se les que vas ter un bo día, seguro que o tes. Se che din
que vas atopar un ser especial co que serás feliz o resto
da túa vida, vivira-las horas observando toda a xente coa
que te cruzas polo camiño. E, se cadra, das con alguén
marabilloso, simplemente porque lle prestaches atención ós
demais.
¿O
país iría mellor se todos tivesémo-la capacidade
de desbotar, no noso diario devir, aquilo que non é científico?
Non o creo. E atrévome a predicirche, amigo Ribao, que daquela
non habería sitio para a túa retranca ourensá.
Anxos Sumai 
|
|
HORRORÓSCOPO
Voulle
facer unha proposta. Colla un xornal e lea os textos de tódolos
signos do horóscopo. A ver se lle ocorre como a min, que
teño a sensación de que calquera deles pode ser
válido. E xa non digamos os que aventuran todo o que vai
acontecer durante un mes enteiro. Cúmprense tódalas
prediccións, pero as de tódolos signos nunha soa
persoa. Outra proposta. Lea as prediccións dun mesmo día
para o seu signo en varios horóscopos distintos. A de cousas
que lle poden pasar nun só día ¡E aínda
hai quen lle da valor de ciencia!
Malia
non ser un experto no tema (o demo me libre), recoñezo
que nisto hai categorías. Hainos que están mellor
escritos, outros son máis enxeñosos, etc. Pero iso
non é ciencia, é literatura. Se un se quere entreter
con contos breves, estupendo. Aínda que para iso está
mellor Augusto Monterroso. Pero que non me veñan a min
con que a conxunción astral no momento no que nacemos vai
marcar día a día a nosa vida. "¡Música!",
que dicía a avoa dun amigo meu cando vía os informativos
da TV. Imos aviados se temos que depender da axuda dos escribáns
da astroloxía. Hai uns días lin o meu horóscopo
nun xornal. Dicía: "En calquera dos inconvenientes
que puideran xurdir, as persoas que te apoiarán incondicionalmente
serán familiares e amigos". ¡Coño, pois
non vai vir un cazador bosquimán a axudarme!. Xa postos
a intentar acertar sempre, eu defendería algo así:
"Vaise erguer cedo, medio durmido, vai ir correndo ó
traballo e chegará uns minutos tarde. Traballará
como un desgraciado todo o día e chegará canso á
casa. Alí, para soportar esa vida frenética, atopará
vostede un apoio fundamental, seguramente un electrodoméstico."
Ciencia pura.
Son
consciente de que neste debate semanal me estou gañando
a fama de escéptico. Pero esta semana estou sensible e
non vou dicir que, como as relixións, deberían de
desaparecer tódolos horóscopos. Coa cantidade de
xente que vive diso. Ademais, voulle facer caso a Mario Bunge
candi di que "o escéptico ten razón cando dubida
de calquera cousa en particular e erra cando dubida de todo na
mesma medida". Por iso fágome eco do mal que o está
pasando algunha xente. Esoutro día, unha bomba desas da
"xustiza infinita" caeu enriba do edificio onde se facía
un xornal en Afganistán. Entre os mortos estaba o encargado
de facer o horóscopo. Pobres afgáns, que xa non
teñen onde se aferrar para ver que vai ser deles.
Roberto Ribao
|
