Falar de Ramom Nogueira é falar dun nome moi vencellado á Internet en Galicia. Director xeral de Dinaweb Networks e de Dinahosting, este ourensán de 35 anos ten un amplo curriculum en experiencias pioneiras en Internet. Creador do portal U-lo, foi o promotor e o primeiro Presidente de Eganet, é ciberirmandiño das ciberirmandades da Fala e promotor do proxecto Alfa. A el se lle deben tamén as I Xornadas de Economía Dixital Galega e a organización dos Last Friday en Galicia.

Un curriculum que non para de medrar xa que, segundo el, actualmente "o mercado da inet (a Internet) non entende de fronteiras nin de horarios comerciais, está aberto as 24 horas e o grao de esixencia é moi elevado". A súa filosofía: "click ou non click, esa é a cuestión".

E como o mercado da inet non para, Ramom Nogueira tampoco. Traballa cun portátil, usa un móbil e un pda. Está localizado case todo o día, polo que a inet é moito máis que un obxecto de traballo, parte da súa vida. De feito, afirma "a nivel persoal o 90% das persoas que coñezo desde hai tres anos coñecinas por inet, reencontrándome con amigos espallados polo mundo tanto en Nova York como en Mauritania". Para os que obxectan que é un medio frío, Ramom di "é un medio e mellora as comunicacións. Nunca substituirá as relacións persoais pero si as mellorará".