A idea xurdiu
vai xa para un ano, cando os membros de Berrogüetto descubrían
no Centro Galego de Arte Contemporánea de Compostela os
traballos de George Rousse. Rousse é un artista francés
que mestura nas súas creacións a pintura, a escultura,
a fotografía e a arquitectura, traballando con espacios
abandonados e baleiros para transformalos en lugares irreais ós
ollos da cámara; pintando as paredes e o chan para crear
volumes que son só ilusións ópticas da fotografía.
Quim Farinha de Berrogüetto viu a mostra e cando comezaban
a preparar o seu terceiro disco, veulle á cabeza o traballo
deste fotógrafo, e pensaron en chamar o artista francés
para encargarlle o proxecto gráfico do seu novo álbum
e unir música e plástica.
Rousse mostrouse interesado na experiencia, accedendo por primeira
vez a incluir a persoas nas súas creacións. Comezou
entón a busca dun lugar axeitado para pór en marcha
o proxecto. E apareceu. As ruinas da antiga factoría de
Sargadelos en Cervo convenceron a todos os participantes. Segundo
explican os músicos, o lugar era especialmente simbólico
polo feito de ser o punto de orixe da renovada industria galega
co Laboratorio de Formas de Galicia e o grupo Sargadelos, a comezos
dos anos cincuenta. Ademais, as ruínas tiñan o encanto
de ser a pegada do principal intento de industrialización
de Galicia no século XVIII, a fábrica posta en marcha
polo Marqués de Sargadelos.
O número sete ("hepta" en grego) sería
o fío conductor do proxecto. Un sete que simboliza as sete
cores do arco da vella, as sete notas musicais, os sete membros
do grupo e un sinfín de cousas máis en interpretacións
máxicas e simbólicas. A presentación do proxecto
realizouse, como non podía ser doutro xeito o día
sete de xullo ás sete da tarde.
Os de Berrogüetto levaban os instrumentos. Rousse as cámaras
e o bo facer. Durante unha semana, do un ó oito de xullo,
un e outros dan renda solta á súa arte. Rousse intervén
nalgúns espacios das ruinas, transformándoos segundo
a súa visión. O grupo vai dándolle forma
as melodías para o vindeiro álbum e colaboran con
Rousse pintando, carrexando, modificando. As ruínas vanse
transformando en espacios máxicos e novos mediante o traballo
de Rousse. Fotografía o grupo. Sete membros para "Hepta".
As fotografías inclúense a grande tamaño
nas instalacións de Rousse. Grávase todo en video,
como é habitual en Rousse.
Unha
das obras de George Rousse
E despois todos a casa. Berrogüetto trasladouse ó
seu novo estudio en Caldas para deixar gravada a súa experiencia
artística, cancións que aínda tiñan
que evoluír e que os propios membros do grupo non daban
por rematadas nin sequera a finais do mes de setembro, na recta
final da producción.
Durante o verán os ourensáns puideron ver outra
expresión do proxecto Hepta. Un concerto na Cidade das
Burgas reuniu a Berrogüetto con sete intérpretes de
música tradicional de sete lugares diferentes do mundo,
cada un deles cun instrumento específico do seu país
de orixe. Unha mestura de música tradicional que seguro
que deixou un bo sabor de boca ós afortunados que a puideron
contemplar.
O día vinteseis de novembro, coñeceremos unha nova
forma do proxecto: "Hepta", unha caixa na que se incluirá
o CD cos temas musicais, ós que acompañará
algunha pista multimedia na que se poderá ver o videoclip
rodado en Sargadelos. Ademais, un amplo libreto que recolle fotografías
do traballo de Rousse, fotografías que tamén podemos
ver na portada do propio disco. E por se fose pouco, desde a discográfica
Boa Music prometen máis sorpresas.
Foi precisamente durante a preparación deste terceiro traballo
cando a Berrogüetto se lle presentou a oportunidade de fichar
por algunha multinacional da música. A pesar de que a oferta
era tentadora, os membros do grupo prefiron seguir coa súa
discográfica de sempre.
Para pouco tempo despois da saída do disco está
prevista a inauguración da web de Berrogüetto, onde
se incorporará un apartado sobre o proxecto "Hepta".
Están pendentes de concretarse novas iniciativas incorporadas
ó proxecto, como poden ser a edición dun libro ou
de diferente material multimedia.
O que si está confirmado é a realización
dun concerto exclusivo de Berrogüetto nas ruínas de
Sargadelos que se realizará a mediados do mes de decembro,
pouco despois da presentación do disco no CGAC, á
que acudirá o propio Rousse e na que se realizarán
proxeccións das fotografías realizadas polo artista
e do videoclip do grupo, presentación que se repetirá
en Madrid.
A partir de aí, o proxecto continúa aberto. A xira
do grupo levará novas mostras de Hepta por toda Galicia
durante un verán máis. E ninguén sabe ata
onde poden chegar estes sete...
