PORTADA>>>
   
   
 

6 OLLADAS:
Campo de Estrelas
Tes dúas posibilidades de descarga:
CONEXIÓN LENTA
CONEXIÓN RÁPIDA
Necesitas Real Player para ver o trailer.
Se non o tes descargao aquí...


O Camiño de Santiago, Patrimonio da Humanidade e Primeiro Itinerario Cultural Europeo, é un camiño de estrelas, sianalado no ceo pola Vía Láctea que serve de guieiro fiel para o camiñante. O mesmo nome de Compostela quere dicir "Campo de Estrelas", unha denominación que adquire unha perspectiva especial ó ver a cidade na noite dende o ceo. Neste traballo de Manel Iglesias amósase unha cidade na noite que mira cara ás estrelas.

"CAMPO DE ESTRELAS"
Dirección e Producción: Manel Iglesias
Edición: Alicia González
Axudantes de Producción: Vanessa Iglesias / Emilio Suárez
Axudante de Dirección:Marisa Gallero
Imaxen: Jesús Martínez
Axudante cámara: David Mayo
Música Orixinal: Oscar Maceda
Efectos virtuais: Raquel Avila
Unha producción de
CALIMERO S.L.

En Santiago as estrelas non só están no ceo, hai que buscalas tamén en terra. Nesta obra do realizador ourensán Manel Iglesias, rodada íntegramente dende dentro da nouturnidade compostelá, a cámara móvese pola cidade, guiando e escurecendo, sempre na procura dunha simboloxía das súas pedras ó abeiro da noite. Porque en Santiago hai infinidade de estrelas nas súas pedras, gárgolas, estatuas ou xeroglíficos, en lugares máxicos gravados de noite. Desde a lonxanía as estrelas miran a cidade, os seus calexóns, as suas xentes pasear cubertas polo manto estelar. A música do compositor Oscar Maceda contribúe a crear o ambiente necesario para achegarse á sensibilidade da idea do realizador e deixarse agarimar polas estrelas que viven sobre os teitos de Santiago.

O realizador
Manel Iglesias naceu en Ourense en 1961. En 1983 comezou a traballar para diversas productoras independentes, resultando seleccionado para formar parte do equipo do "Arquivo da Imaxe de Galicia" onde foi responsable do departamento de postproducción ate 1985. Nese ano incorporouse á Televisión de Galicia como realizador especializado en retransmisións e gravou varios documentais en diferentes países.
En 1990 trasladouse a Madrid onde formou parte primeiro do equipo de informativos de Telecinco e despois en programas de entretemento e musicales. En 1992 comeza en Globomedia xunto con Emilio Aragón, deseñando formatos para diferentes cadeas. Despois dunha estadía en Lisboa como representante de Videomedia volta a Madrid en 1996 para entrar como responsable das realizacións de eventos en directo de CANAL+.
Entre as súas produccións máis destacadas está a realización do concerto de "Los Tres Tenores" en Barcelona, a gala de entrega dos premios Ondas en 1977, os documentais feitos para Elías Querejeta, as retransmisións das edicións do 96 ó 2000 da entrega dos Oscar para CANAL+. Conta entre os recoñecementos que recibíu polos seus traballos con dous premios TP, un premio Ondas, e dous premios Midia.


Seis olladas

Durante o ano 2000 a cidade de Santiago de Compostela tivo o título de Capital Cultural de Europa. Esta celebración e a programación constante de actividades que se deron na cidade influiron en moitas das produccións artísticas e culturais do momento. Entre algunhas da produccións audiovisuais que se realizaron con motivo da capitalidade cultural están seis traballos de videocreación impulsados por CANAL+. Baixo o título xeral de "Seis olladas de Compostela" outros tantos realizadores tentaron recrear a esencia da capital compostelá. A estrea destes seis traballos fíxose dentro dunha programación televisiva especial que CANAL+ emitiu para festexar a capitalidade cultural no día festivo do 25 de xullo, baixo o título "Día de Santiago". "Os Peregrinos", de Xavier Bermúdez, é unha destas creacións. Outros realizadores como Isabel Coixet, Antón Reixa, Manuel Iglesias, Ricardo Boo e Manuel Palacios, asinan os demais traballos. O escritor Manuel Rivas actúa como prologuista do conxunto destas seis persoais visións sobre Santiago de Compostela aportando tamén el, a través da palabra, a súa propia visión sobre a cidade de pedra. Estas realizacións soportan a súa estética de imaxen sobre bandas sonoras asinadas por algúns dos mellores músicos e compositores do panorama galego e español, do gaiteiro Carlos Núñez ó compositor Manuel Rodeiro, pasando por músicos e intérpretes como Mercedes Peón, Leilía, Cristina Pato, BIOS, ou César Casal (Chopsuei).

Agradecementos:
A presentación destas realizacións é posible gracias a INCOLSA e
O noso agradecemento especial ó compositor Manuel Rodeiro, ós músicos Maxo Nóvoa e Coché Villanueva (BIOS), e á Asociación Cultural Leilía.

 

 

Cultura Galega.org
Inicio /Especiais / Arte / Comunicación / Música / Espectáculos / Historia / Lingua e Literatura / Sociedade /
Certames / Arquivos / Participa / Xénese / Alén da Terra / Zona Cultura / Colaboracións
Correo / Acerca de Cultura Galega.org


Cultura Galega.org é unha iniciativa do Consello da Cultura Galega
©Consello da Cultura Galega, 2000