PORTADA>>>
   
   
 
TOCANDO NA MÚSICA TRADICIONAL


Se hai moitos xeitos de tocar música, en Lalín tócase dunha maneira moi peculiar esta fin de semana. O primeiro Congreso de Antropoloxía Musical Galega aborda a función da música na sociedade tradicional e na construcción dunha cultura diferenciada. O encontro, organizado polo Conservatorio de Música Tradicional e Folque de Lalín, comprende conferencias, coloquios, exposicións e, por suposto, concertos.

Baixo o tema central da invención da tradición, o Congreso de Antropoloxía Musical Galega que comeza o venres vintecinco en Lalín tratará a relación da música popular coa sociedade e a súa importancia na construcción cultural. Avanzando desde a antropoloxía xeral ata á análise do texto musical, pasando pola situación desta arte no século XIX, contemplaranse os máis diversos aspectos da tradición sonora galega.

Os relatorios: Contexto
O programa do congreso dedica a súa primeira xornada, a do venres vintecinco, a dar unha visión de contexto da música desde a Antropoloxía e a Historia. Con esta xornada búscase comprender o mecanismo de cambio social desde a cultura tradicional á de masas e o reflexo desa mudanza sobre a música. No mesmo sentido investígase como se conservou a tradición musical a través dos cancioneiros e ata que punto a recreación desa música pode considerarse unha invención da tradición ó ter chegado a nós por medios non tradicionais.

Para tratar estes temas interverán o destacado antropólogo Marcial Gondar Portasany, e os musicólogos Pilar Alén e José Antonio Gómez. Todos eles intercambiarán impresións nunha mesa redonda co título "A invención da tradición".


Os relatorios: O Texto
A segunda xornada do encontro centrarase no texto musical en si mesmo, abordándoo coma creación-recreación, coma análise e coma proceso de comunicación. Así verase o emprego do folclore nas novas composicións ou os métodos de análise e de ensino da música popular.

Os encargados de tratar estas cuestións serán o compositor Millán Picouto, o profesor de análise musical Ramón Sobrino e a educadora musical portuguesa Rosa María Torres.


Actividades
Ademais das conferencias e coloquios desta fin de semana, desde o pasado luns véñense desenvolvendo varios actos pararelos.
Así, no propio edificio do Conservatorio de Música da vila pódese ver unha mostra sobre o tecido tradicional e o emprego que se lle daba no século XIX. Ademais das pezas de tecido en si, poden verse algunhas das ferramentas empregadas para facer estas teas. Dedntro desta mesma mostra o luns pasado presentouse o libgro "O tecido" de Manuel Rodríguez Calviño e Belén Sáez-Chas Díaz, editado polo Museo do Pobo Galego.

Ata onte mesmo estiveron a proxectarse no mesmo edificio as películas "Nuestras fiestas de allá" e "Galicia y Buenos Aires", rodadas por José Gil en 1928 e 1931 respectivamente e que amosan as tarefas agrícolas e as festas na sociedade tradicional. Aínda que non chegues a tempo de velas, non te preocupes, están no noso Soportal de Cine.

Dentro destes actos realizouse o xoves unha visita guiada ó Museo Etnográfico de Doade, e o día vinteseis, no acto de clausura, proxectarase un video e farase unha homenaxe ó grupo de gaiteiros da comarca "Os dezas". Ese mesmo día está previsto un concerto de alumnos do conservatorio no que interpreterán temas tradicionais arranxados para a ocasión.

Os actos pecharanse o sábado co concerto-presentación do disco de Henrique Otero "O gaiteiro do Fragoso", resumo de toda unha carreira coma intérprete e compositor de gaita. Se che queda pena de non escoitalo, tes unha mostra deste traballo en RCG.


Conservatorio de Música Tradicional

O Conservatorio de Música Tradicional e Folque de Lalín naceu hai dous anos coa intención de formar profesionais da música tradicional. Nel impártense cursos de diferentes instrumentos coma gaita, zanfona, acordeón ou percusión, ademais de abordar o canto e outros aspectos prácticos de música patrimonial. A nivel teórico tamén se trata o método de estudio da música patrimonial, as últimas tendencias de estudio e a ética e estética da nosa cultura musical.

Actualmente hai oitenta alumnos matriculados, que participan tamén en cursos temáticos, obradoiros e conferencias. O centro é o segundo de Galicia dedicado á música tradicional e o primeiro que busca un proxecto curricular de centro, acadando consolidarse coma o referente na formación no eido da música tradicional.

A dirección do centro está a cargo de Uxía Pedreira, que imparte a asignatura de canto ademais de ser vocalista do grupo Chouteira. Outros profesionais da música implicados no proxecto son José Dopico, encargado da fonoteca e da biblioteca, Edelmiro Fernández, profesor de gaita, Francisco Estévez, docente en percusión ou Óscar Sanjurjo, que dá as clases de sanfona.



Actos no congreso e relacionados
Calendario de actos paralelos programados no congreso para esta fin de semana:

MAIO      
Ata o día 26
Exposición "O tecido" no Conservatorio de Música de Lalín, pezas de liño, la, seda... amosan a vestimenta empregada no mundo rural durante o século XIX e como se elaboraba.
Sábado 26 ás 18:00h Homenaxe a "Os Dezas"
O acto de recoñecemento a este grupo histórico de gaiteiros da comarca inclúe a proxección dun video sobre o grup.
ás 19h Concerto dos Combos Folque
Alumnos e alumnas do conservatorio folque interpretarán pezas tradicionais arranxadas por eles mesmos e os seus profesores.
Presentación do disco de Henrique Otero "O gaiteiro do Fragoso"
Inclúe un concerto deste veterán intérprete e compositor de gaita.

Consulta a páxina do Conservatorio de Música Tradicional e Folque de Lalín

 

 

Cultura Galega.org
Inicio /Especiais / Arte / Comunicación / Música / Espectáculos / Historia / Lingua e Literatura / Sociedade /
Certames / Arquivos / Participa / Xénese / Alén da Terra / Zona Cultura / Colaboracións
Correo / Acerca de Cultura Galega.org


Cultura Galega.org é unha iniciativa do Consello da Cultura Galega
©Consello da Cultura Galega, 2000